హైదరాబాద్‌లో ఓ పోలీసు కానిస్టేబుల్ చేసిన ఓ పని వల్ల ఏకంగా 10 మందికి కరోనా పాజిటివ్ అని తేలింది. తాజాగా హైదరాబాద్‌లోని చిక్కడపల్లి పోలీస్ స్టేషన్‌లో ఈ ఘటన జరిగింది. తనకు కొడుకు పుట్టాడనే సంతోషంతో ఓ పోలీస్ కానిస్టేబుల్ తన ఆనందాన్ని మిఠాయిల రూపంలో పంచుకున్నాడు. స్టేషన్‌లోని పోలీసులందరికీ స్వీట్లు పంచాడు. ఈ స్వీట్లు తిన్న 10 మందికి పైగా పోలీసు సిబ్బందికి కరోనా సోకినట్టు తెలుస్తోంది. అయితే ఆ కానిస్టేబుల్ తమ్ముడికి కూడా కరోనా సోకిందని అతని కారణంగానే కానిస్టేబుల్‌కు కూడా కోవిడ్ 19 సోకి ఉంటుందని అనుమానిస్తున్నారు. అయితే దీనిపై పోలీసు ఉన్నతాధికారులు, వైద్యాధికారులు ఇంకా స్పందించలేదు. కరోనా వైరస్ తెలంగాణలో దావానంలా వ్యాప్తి చెందుతోంది. ఎవరికి వారు తాము పూర్తి ఆరోగ్యంతోనే ఉన్నామనే నమ్మకంతో ఎప్పటిలాగే తోటి వారితో గడపడం తీవ్ర నష్టాన్ని తెచ్చిపెడుతోంది. హైదరాబాద్‌లో కరోనా కేసుల సంఖ్య రోజురోజుకూ పెరిగిపోతుండటంతో ప్రజలు ఇంకా అప్రమత్తంగా ఉండాలని అధికారులు చెబుతున్నారు.
