దర్శకుడు పూరి జగన్నాథ్ చిత్రం అనగానే అందులో ఖతర్నాక్ ఐటం సాంగ్ ఉంటుందని ప్రత్యేకంగా చెప్పాల్సిన పనేలేదు. ఆ సాంగ్ కోసం ఆయన ప్రత్యేకంగా ఒక నటిని ఎంచుకొని, తెలుగు ప్రేక్షకులకు పరిచయం చేస్తూనే ఉంటాడు. అది ఆయన మార్క్ గా మిగిలిపోయింది. ఇప్పుడు రామ్ హీరోగా ‘ఇస్మార్ట్ శంకర్’ సినిమాను రూపొందిస్తున్నాడు పూరి. ఈ సినిమాలో రామ్ రఫ్ లుక్ తో కనిపిస్తూ .. మాస్ ఆడియన్స్ లో ఆసక్తిని రేపుతున్నాడు. నిధి అగర్వాల్ కథానాయికగా నటిస్తోన్న ఈ సినిమా, చకచకా షూటింగ్ జరుపుకుంటోంది. ప్రస్తుతం యాక్షన్ సన్నివేశాల చిత్రీకరణ జరుగుతోంది.
ఈ సినిమాకి మణిశర్మ సంగీతాన్ని అందిస్తున్నాడు. గతంలో పూరి – మణిశర్మ కాంబినేషన్లో వచ్చిన ‘పోకిరి’ సినిమా భారీ విజయాన్ని అందుకుంది. ఆ సినిమాలో ‘ఇప్పటికింకా నా వయసు నిండా పదహారే .. ‘అంటూ సాగిన ఐటమ్ సాంగ్ ఇప్పటికీ కుర్రాళ్ల గుండెల్లో సందడి చేస్తూనే ఉంది. ఆ ఐటమ్ సాంగ్ కి మించిన ట్యూన్ చేయమని పూరి చెప్పడంతో .. మణిశర్మ ఆ పనిని పూర్తిచేశాడని అంటున్నారు. త్వరలోనే ‘నోరా ఫతేహి’పై ఈ ఐటమ్ సాంగ్ ను చిత్రీకరించనున్నట్టు తెలుస్తోంది. మొత్తానికి పోకిరి సిరీస్ తీస్తున్నట్టున్నాడు పూరి. ఈ చిత్రం కూడా అంతటి విజయాన్ని రామ్ కి తెచ్చిపెట్టనుందా.. చూడాల్సి ఉంది.