పల్లవించిన నా ప్రేమ
గీతానికి ప్రాణం నీవే-
ప్రతి ఉదయం ప్రభవించీ
జగతికి ప్రేమను పంచే –
“ఉష్ణ” కిరణ సంచయంలో
ప్రాచీదిశాంగన నుదుట
కుంకుమ నీవే-
సేద తీర్చే “పవనం”లో
గుసగుసల ప్రేమ భాషవి నీవే-
“గగన”తలాన తెల్లని దూది
మబ్బుల వలపుల ఊహల పల్లకీలో
ఊరేగే ప్రేమ దేవత నీవే-
నా డెంద మనే బీడు “నేల”పై
వర్షించే ప్రణయ “వృష్టి”వి నీవే-
వలపుల భువిలో
ప్రశాంతత నొసగే ప్రేమ క్షేత్రం నీవే-
పంచభూతాల పరిష్వంగంలో
ప్రకృతై శోభిస్తున్నావు –
నా జీవన తీరాన్ని చేర్చే
ప్రణయరాగమై నినదిస్తున్నావు-
-అంశు మాలి, టెక్కలి