సికింద్రాబాద్ నుంచి ఫిలింనగర్ వెళ్లే 47నంబర్ గల సిటీ బస్.. మార్గమధ్యలోని పంజాగుట్ట వద్ద ఎక్కాలంటే సాహసం చేయాల్సిందే. ఈ మార్గంలో తగినన్ని బస్సులు లేకపోవడంతో ఉదయంపూట ప్రయాణీకులు తీవ్ర ఇబ్బందులెదుర్కొంటున్నారు. విద్యా సంస్థలు, ప్రైవేట్ ఆసుపత్రులు, ప్రభుత్వ, ప్రైవేట్ కార్యాలయాలు అధికంగా ఉన్న ఈ మార్గంలో ప్రయాణీకుల రద్దీతో బస్సులు కిటకిటలాడుతుంటాయి. మహిళలు, వృద్దులు రద్దీగా ఉన్న బస్సులు ఎక్కాలంటే ప్రయాణీకులు నానా తంటాలు పడుతున్నారు.
పరిమిత బస్సులు తిరిగే ఈ మార్గంలో నిత్యం వందల సంఖ్యలో ప్రయాణీకులు సిటీ బస్సులో ప్రయాణించి తమ గమ్యస్థానాలకు చేరుకొంటారు. ఈ రూటు లో నడిచే బస్సులు తక్కువగా ఉండడంతో తాము ప్రయాణంలో ఇబ్బందులు పడాల్సి వస్తుందని ప్రయాణీకులు ఆందోళన వ్యక్తం చేస్తున్నారు. ఇప్పటికైనా ఆర్టీసీ ఉన్నతాధికారులు స్పందించి ఈ మార్గంలో అదనంగా బస్సులు నడపాలని నిత్యము రాకపోకలు సాగించే ప్రయాణీకులు కోరుతున్నారు.