ఆన్‌లైన్‌లో భారీ డిస్కౌంట్లు ఆఫర్ చేస్తూ ప్రకటనలిస్తున్న నకిలీ వెబ్‌సైట్లను గుడ్డిగా నమ్మి మోసపోవద్దని సైబరాబాద్ క్రైమ్స్ డీసీపీ రోహిణి ప్రయదర్శిని సూచించారు. మోసాలకు పాల్పడే ఈ-కామర్స్ వెబ్‌సైట్లపై అప్రమత్తంగా ఉండాలని ఆమె తెలిపారు. సైబరాబాద్ సైబర్‌క్రైమ్ పోలీసులకు వచ్చిన ఫిర్యాదులపై ఈ సందర్భంగా ఆమె వివరించారు. సైబరాబాద్ పరిధిలో నివాసముండే బాధితుడి సెల్‌ఫోన్‌కు ఈ నెల 11న హెచ్-మోన్‌టక్ పేరుతో ఎంఆర్‌పీ మీద 60 శాతం డిస్కౌంట్ ధరలకు మోంట్‌బ్లాక్ ఉత్పత్తులు లభిస్తున్నాయంటూ మెసేజ్ వచ్చింది.
దీంతో ఆయన https://www.montblancofficial.com/ వెబ్‌సైట్‌లోకి వెళ్లి రూ.12 లక్షల విలువైన వస్తువులను ఎంపిక చేసుకున్నాడు, డిస్కౌం ట్ తరువాత రూ.503,140 చెల్లించాల్సి ఉంది. దీంతో ఆ సంస్థ కాల్‌సెంటర్‌కు ఫోన్ చేసి డెలివరీకి సంబంధించిన వివరాలను అడిగాడు. మొత్తం డబ్బు చెల్లించాలని, ఆ తరువాతే వస్తువులు మూడు రోజుల్లో సూచించిన చిరునామాకు డెలివరీ అవుతాయంటూ సూచించారు. దీంతో బాధితుడు ఆ డబ్బు చెల్లించాడు. తీరా ఇంటికి వచ్చిన వస్తువులను పరిశీలిస్తే అవన్నీ డూప్లికేట్ వస్తువులని తేలాయని బాధితుడు పోలీసులకు ఫిర్యాదు చేశాడు. దీంతో ఈ ఘటనపై కేసు నమోదు చేసి దర్యాప్తు జరుపుతున్నామని ఆమె తెలిపారు.