చిరునవ్వులు వెల్లువలై
ప్రవహిస్తున్నాయి
ఒకపరి మునకలేద్దామా నేస్తం
కల్మషమెరుగని కోయిల
సత్యరాగం అందుకుంది
అందులో స్వరం కలుపుదామా నేస్తం
విజ్ఞానం మన ముంగిట
కల్పవృక్షమై పెరిగింది
విజ్ఞతనే నీరు పోసి
పోషిద్దామా నేస్తం
కష్ట సుఖాలు కలసి
వడి వడిగా వెళుతున్నాయి
వాటి అడుగుల్ని మనం
అనుసరిద్దామా నేస్తం
ఓర్పును సమానంగా పంచుకొని
ఓదార్పు దారిలో
నేర్పుగా పయనిద్దామా నేస్తం
చదువులమ్మ ఒడిలో
అక్షరాలాట ఆడుతూ
సులక్షణమైన సంస్కారాన్ని
గెలిచేద్దామా నేస్తం
సాదకబాధల్ని కుడి భుజాలపై
చెరిసగం మోస్తూ
స్వేచ్ఛగా కదులుదామా నేస్తం
హృదయపుటంచుల్లో ఉదయించే
కిరణాలమై లోకానికి
స్పూర్తి రేఖలవుదామా నేస్తం
చేయి చేయి కలిపి
చెలమలో చెలిమి తామరులై
ఉన్నతంగా వికసిస్తూ
మంచి పరిమళాల్ని
వెదజల్లుదామా నేస్తం
ఒకరికొకరమై
అందరివారమై
స్నేహ జీవులమై
జీవిద్దామా నేస్తం
••••••••○••••••••
రచన: నరెద్దుల రాజారెడ్డి