నాగ చైత‌న్య, సమంత, దివ్యాంక కౌశిక్ ప్ర‌ధాన పాత్ర‌ల‌లో శివ నిర్వాణ తెర‌కెక్కించిన చిత్రం “మజిలీ”. దేర్ ఈజ్ లవ్ దేర్ ఈజ్ పెయిన్ ఉపశీర్షిక. షైన్ స్క్రీన్ పతాకంపై సాహు గారపాటి, హరీష్‌ పెద్ది ఈ చిత్రాన్ని నిర్మిస్తున్నారు. ఏప్రిల్ 5న విడుదల కానున్న ఈ చిత్రానికి సంబంధించి జోరుగా ప్ర‌మోష‌న్ కార్య‌క్ర‌మాలు చేప‌డుతున్నారు. ప్రమోషన్స్‌లో భాగంగా తాజాగా ఈ చిత్రంలోని ‘‘నా గుండెల్లో’’ సాంగ్ మేకింగ్ వీడియోను విడుదల చేశారు. ఈ సాంగ్ పాడిన యాజిన్ నైజర్, నిఖితాగాంధీని, పలు షూటింగ్ లొకేషన్స్‌ని చూపిస్తూ ఈ వీడియోను కట్ చేశారు. ఇప్పటికే ఈ సినిమా నుంచి వచ్చిన అప్‌డేట్స్ అన్నీ సినిమాపై భారీ అంచనాలు క్రియేట్ చేశాయి.
ఇటీవలే ఆదివారం ఈ చిత్రానికి సంబంధించిన ప్రీ రిలీజ్ కార్యక్రమం జరిగింది. ఈ వేడుకకు నాగార్జున, వెంకటేష్ ముఖ్య అతిథులుగా విచ్చేశారు. ఈ వేడుకలో విడుదల చేసిన ట్రైలర్ కు కొన్ని గంటల్లోనే 2 మిలియన్ డిజిటల్ వ్యూస్ తో సోషల్ మీడియాలో దూసుకుపోవడం విశేషం. దీంతో చిత్రబృందం సంతోషం వ్యక్తం చేస్తున్నారు. సినిమా హిట్ అవుతుందనే నమ్మకంతో ఉన్నారు. ప్రేక్షకులు కూడా వెండితెరపై సమంత, నాగచైతన్యను చూడడానికి ఆతృతగా ఉన్నారు.