చిత్రసీమలో సుశాంత్ సింగ్ రాజ్పుత్ ఆత్మహత్య సంచలనంగా మారిన సంగతి తెలిసిందే. 34 ఏళ్ల వయసులోనే తనువు చాలించిన ఈ యువనటుడి మరణంపై పోలీసుల దర్యాప్తు వేగంగా సాగుతోంది. మరోవైపు సుశాంత్ సింగ్ ఆత్మహత్య చేసుకునేంత పిరికివాడు కాదని, ఆయన మరణం వెనుక ఏదో బలమైన కారణం ఉండే ఉంటుందని సన్నిహితులు చెబుతుండటం పలు అనుమానాలకు తావిస్తోంది. సరిగ్గా ఇలాంటి పరిస్థితుల్లో సుశాంత్ బయోపిక్ తీస్తానంటూ సంచలన ప్రకటన చేశాడు క్రిటిక్, నిర్మాత, నటుడు కమల్ ఆర్ ఖాన్ అలియాస్ కేఆర్కే. తన ట్విట్టర్ ఖాతా ద్వారా సుశాంత్ బయోపిక్ తెరకెక్కించనున్నట్టు ప్రకటించిన ఆయన.. సుశాంత్ మరణానికి కారణమైన దుర్మార్గుల జీవితాలను బయటపెట్టే ప్రయత్నం చేస్తానని చెప్పడం హాట్ ఇష్యూగా మారింది. ఈ మేరకు బాలీవుడ్ ప్రముఖులను ద్వేషించడానికి తాను చాలా ఇష్టపడతానంటూ కేఆర్కే తన ట్వీట్లో వెల్లడించారు.
గతంలో చాలాసార్లు సుశాంత్ సింగ్ రాజ్పుత్ను కించపరిచే కామెంట్స్ చేశాడు కేఆర్కే. సుశాంత్ నటించిన డ్రైవ్, రా, సంచిదియా, కేదారినాథ్, చందమామ దూర్ కే సినిమాలు చెత్తగా ఉన్నాయని రివ్యూలు ఇచ్చాడు. ఈ క్రమంలో కేఆర్కే ట్వీట్ చూసిన సుశాంత్ అభిమానులు సోషల్ మీడియాలో రచ్చ చేస్తున్నారు. సుశాంత్ బయోపిక్ తీసే అర్హత కేఆర్కేకు లేదని పేర్కొంటూ #FakeKRKRealCulpritOfSushant అనే ట్యాగ్ను వైరల్ చేస్త్తున్నారు.