దేశంలో కరోనా కేసుల సంఖ్య 73కు చేరింది. బెంగుళూరులోని గూగుల్ లో పనిచేస్తున్న ఓ ఉద్యోగికి కరోనా వైరస్ వచ్చిందని శుక్రవారం ఉదయం తేలింది. దీంతో ముందుజాగ్రత్త చర్యగా బెంగళూరు గూగుల్ కార్యాలయంలో పనిచేస్తున్న ఉద్యోగులను శుక్రవారం ఇంటి నుంచే పనిచేయాలని ఆదేశాలు జారీ చేశారు. ‘‘ శుక్రవారం బెంగళూరులోని మా గూగుల్ కార్యాలయంలో పనిచేస్తున్న ఓ ఉద్యోగికి కరోనా వైరస్ పాజిటివ్ అని రిపోర్టు వచ్చింది. దీంతో అతన్ని ఐసోలేషన్ వార్డుకు తరలించాం. ముందు జాగ్రత్త చర్యగా మా ఉద్యోగులను వర్క్ ఫ్రం హోం చేయాలని కోరాం’’ అని గూగుల్ విడుదల చేసిన ఓ ప్రకటనలో పేర్కొంది. కరోనా వైరస్ సోకిన ఉద్యోగితో సన్నిహితంగా మెలిగిన ఉద్యోగులను కూడా క్వారంటైన్ చేశామని, వారి ఆరోగ్య పరిస్థితిని పరిశీలిస్తున్నామని గూగుల్ తెలిపింది. ప్రజారోగ్యం దృష్ట్యా తాము ఇంటి నుంచే పనిచేయాలని తమ ఉద్యోగులను ఆదేశించామని గూగుల్ వివరించింది.
బెంగుళూరు : గూగుల్ ఉద్యోగికి కరోనా పాజిటివ్
