2011 వన్డే ప్రపంచకప్ ఫైనల్ మ్యాచ్‌ ఫిక్సింగ్… శ్రీలంక మాజీ క్రీడల మంత్రి సంచలన వ్యాఖ్యలు

భారత్, శ్రీలంక మధ్య ముంబయిలోని వాంఖడే వేదికగా జరిగిన 2011 వన్డే ప్రపంచకప్ ఫైనల్ మ్యాచ్‌ ఫిక్సింగ్‌కి గురైనట్లు.. శ్రీలంక అప్పటి క్రీడల మంత్రి మహీందానంద అలుత్‌గమాగే సంచలన ఆరోపణలు చేశాడు. ఆ ఫైనల్ మ్యాచ్‌పై తాజాగా ఓ ఇంటర్వ్యూ మహీందానంద అలుత్‌గమాగే మాట్లాడుతూ “నేను ఈరోజు చెప్తున్నా.. 2011 వన్డే ప్రపంచకప్‌ ఫైనల్స్‌లో శ్రీలంక అమ్ముడుపోయింది. నేను అప్పట్లో స్పోర్ట్స్ మినిస్టర్‌.. అయినప్పటికీ నమ్మక తప్పడం లేదు. 2011లో వన్డే ప్రపంచకప్‌ని శ్రీలంక గెలిచి ఉండేది. కానీ.. ఆ మ్యాచ్‌ని మేము అమ్మేశాం. నేను ఏ ఆటగాడితోనూ ప్రస్తుతం కాంటాక్ట్‌లో లేను. కానీ.. టీమ్‌లోని కొంతమంది ఫిక్సింగ్‌కి సహకరించారు” అని సంచలన ఆరోపణలు చేశాడు. ఆ మ్యాచ్‌లో టాస్ వద్దే కెప్టెన్లు మహేంద్రసింగ్ ధోనీ, కుమార సంగక్కర మధ్య కన్‌ప్యూజన్ కారణంగా రెండు సార్లు టాస్ వేయాల్సి వచ్చింది. ఆ తర్వాత శ్రీలంక తుది జట్టు ఎంపికపైనా ఆ దేశ మాజీ కెప్టెన్ అర్జున్ రణతుంగ అప్పట్లో ఆశ్చర్యం వ్యక్తం చేస్తూ.. మ్యాచ్‌లో ఫిక్సింగ్ జరిగినట్లు ఆరోపణలు గుప్పించాడు. తాజాగా ఆ దేశ క్రీడల మంత్రి స్వయంగా ఆరోపణలు చేయడంతో ఫైనల్‌ మ్యాచ్‌పై అందరిలోనూ సందేహాలు మొదలయ్యాయి. ఆ మ్యాచ్‌లో ఫస్ట్ బ్యాటింగ్ చేసిన శ్రీలంక జట్టు.. మహేల జయవర్దనె (103 నాటౌట్: 88 బంతుల్లో 13×4) శతకం బాదడంతో 6 వికెట్ల నష్టానికి 274 పరుగులు చేసింది. అనంతరం లక్ష్యాన్ని భారత్ జట్టు.. గౌతమ్ గంభీర్ (97: 122 బంతుల్లో 9×4), మహేంద్రసింగ్ ధోని (91 నాటౌట్: 79 బంతుల్లో 8×4, 2×6) బాధ్యతాయుత ఇన్నింగ్స్‌లు ఆడటంతో 48.2 ఓవర్లలోనే 277/4తో ఛేదించింది. 1983లో తొలిసారి వన్డే ప్రపంచకప్ గెలిచిన భారత్ జట్టు.. 28 ఏళ్ల సుదీర్ఘ నిరీక్షణ తర్వాత మళ్లీ 2011లో వరల్డ్‌కప్ గెలిచిన విషయం తెలిసిందే.