జర్మనీకి చెందిన భౌతిక శాస్త్రవేత్త ఆల్బర్ట్ ఐన్‌స్టీన్ 14 మార్చి, 1879 జన్మించారు. ఆధునిక భౌతికశాస్త్రానికి మూలమైన జనరల్ థియరీ ఆఫ్ రిలెటివిటీని ఆయనే ప్రతిపాదించారు. మాస్ ఎనర్జీ ఈక్వివలెన్స్ ఫార్ములా E = mc2 (ఎంసీ స్క్వేర్)ను కనిపెట్టింది కూడా ఆయనే. అపర మేథావిగా పేరొందిన ఐన్‌స్టీన్ 76 ఏళ్ల వయస్సులో 1955, ఏప్రిల్ 18న న్యూజెర్జీలోని ప్రిన్‌సెటాన్ ఆసుపత్రిలో నిద్రలోనే కన్నుమూశారు. మెదడులో అంతర్గత రక్తస్రావం జరగడంతో ఆసుపత్రిలో చేరారు. సర్జరీ చేస్తే మరికొన్ని రోజులు బతికే అవకాశం ఉంటుందని వైద్యులు తెలిపారు. అయితే, తనకు బలవంతంగా, కృత్రిమంగా జీవించాలని లేదని, ఎప్పుడైతే చావు వస్తుందో అప్పుడే చనిపోతానని సమాధానం ఇచ్చారు. దీంతో వైద్యులు ఆయనకు సర్జరీ చేయలేదు. మరణం తర్వాత తన శరీరాన్ని పూర్తిగా దహనం చేయాలని, తన భౌతిక కాయంపై ఎలాంటి పరిశోధనలు చేయకూడదని కోరారు. అయితే, ఆయన అనుకున్నది మాత్రం జరగలేదు. ఐన్‌స్టీన్ మృతదేహానికి శవ పరీక్ష నిర్వహించిన వైద్యుడు డాక్టర్ థామస్ హార్వే.. ఆయన మెదడును దొంగిలించాడు. ఐన్‌స్టీన్ కుటుంబికుల అనుమతి లేకుండానే హార్వే ఈ చర్యకు పాల్పడ్డాడు.
ఐన్‌స్టీన్ మెదడును దొంగిలించిన హార్వే.. దాని బరువును 1230 గ్రాములు ఉన్నట్లు పేర్కొన్నాడు. ఆ మెదడును మొత్తం 240 ముక్కలు చేశాడు. వాటిని రసాయనాలతో కూడిన జాడీలో పెట్టి తన పరిశోధనశాలలోని బేస్మెంట్‌లో జాగ్రత్త పరిచాడు. ఈ చర్య వల్ల హర్వే ఉద్యోగాన్ని కోల్పోయాడు. అయితే, ఐన్‌స్టీన్ మెదడుపై అధ్యయనం చేయడానికే హర్వే ఈ చర్యకు పాల్పడినట్లు తెలిసింది. ఐన్‌స్టీన్ మెదడుతో హర్వే ప్రపంచమంతా పర్యటించాడు. 40 ఏళ్ల తర్వాత ఆ ముక్కలను శాస్త్రవేత్తలకు అప్పగించాడు. అప్పటి వరకు ఎవరికీ ఈ విషయం తెలియకపోవడం గమనార్హం. ఐన్‌స్టీన్ మెదడుపై పరిశోధనలు చాలా ఏళ్లు రహస్యంగానే సాగాయి. అతని మేధస్సుకు వెనుక కారణాన్ని తెలుసుకునేందుకు ఎంతో మంది ఆతృతగా ఎదురుచూశారు. చివరికి 1985లో ఐన్‌స్టీన్ మెదడు ప్రత్యేకతలను బయటపెట్టారు. ఐన్‌స్టీన్ మెదడు సాధారణ మనుషులకు ఉండే మెదడు కంటే విభిన్నమైనది. ఆయన మెదడులోని లోయర్ పరైటాల్ లోబ్ 20 శాతం పెద్దదిగా ఉండటం వల్ల ఆయన గణితంలో నైపుణ్యవంతులయ్యారని శాస్త్రవేత్తలు పేర్కొన్నారు. సాధారణ మెదడులో కంటే 17 శాతం అధిక న్యూరాన్లు ఐన్‌స్టీన్ మెదడులో ఉన్నాయన్నారు. దీనివల్ల ఆయన మెదడు చురుగ్గా పనిచేసేదని తెలిపారు. ప్రస్తుతం ఆ మెదడు భాగాలు ఫిలడెల్ఫియాలోని మట్టర్ మ్యూజియంలో ఉన్నాయి.
వంశీ చెబుతున్న వెబ్‌సైట్లతో నాకు సంబంధం లేదు: లోకేశ్