కరోనా ఎఫెక్ట్ తో లాక్ డౌన్ కొనసాగుతున్న కారణంగా సెలబ్రిటీలందరూ సోషల్ మీడియాకే పరిమితం అయ్యారు. సినిమా, సీరియళ్ళ షూటింగులు కూడా ఆగిపోయిన విషయం తెలిసిందే. ఇప్పుడు సెలెబ్రిటీలందరూ ఈ లాక్ డౌన్ టైంలో ఎలా గడుపుతున్నారో సోషల్ మీడియా ద్వారా తమ అభిమానులకు తెలియజేస్తున్నారు. కాగా…కరోనా కారణంగా తీవ్రంగా నష్టపోయిన రంగాల్లో సినిమా రంగం ఒకటి. అయితే కరోనా సంక్షోభం వల్ల ముఖ్యంగా నష్టపోయేది నిర్మాతలే. అందుకే పారితోషికాలు తగ్గించుకోవాలని నటీనటులు, టెక్నీషియన్లను నిర్మాతలు కోరుతున్నారు. తమిళ సినిమా ఇండస్ట్రీలో నిర్మాతల పిలుపునకు స్పందన వస్తోంది. హీరో, సంగీత దర్శకుడు విజయ్ ఆంటొని ఇప్పటికే తన పారితోషికం తగ్గించుకుంటున్నట్టు ప్రకటించారు. ఇప్పుడు మరో స్టార్ దర్శకుడు తన పారితోషికాన్ని తగ్గించుకున్నారు. కోలీవుడ్‌లో కమర్షియల్ సినిమాలు తెరకెక్కించడంలో స్పెషలిస్టుగా పేరు తెచ్చుకున్న స్టార్ డైరెక్టర్ హరి తన పారితోషికంలో 25 శాతం తగ్గించుకుంటున్నట్టు ప్రకటించారు. ప్రస్తుతం ఆయన సూర్య హీరోగా ‘అరువ’ సినిమా చేస్తున్నారు. ఈ సినిమాకు తన పారితోషికాన్ని తగ్గించుకుంటున్నట్టు హరి ఒక ప్రకటన విడుదల చేశారు. ‘‘కరోనా మహమ్మారి వల్ల మన తమిళ ఇండస్ట్రీకి పెద్ద దెబ్బ తగిలింది. మనం మన నిర్మాతలకు అండగా ఉంటేనే ఇండస్ట్రీ మళ్లీ కోలుకోగలుగుతుంది. ఈ పరిస్థితిని దృష్టిలో ఉంచుకుని ‘అరువ’ సినిమాకు నేను తీసుకుంటున్న పారితోషికంలో 25 శాతం తగ్గించుకుంటున్నాను’’ అని తన ప్రకటనలో హరి పేర్కొన్నారు. కాగా, ‘అరువ’ చిత్రాన్ని స్టూడియో గ్రీన్ సంస్థ నిర్మిస్తోంది. ఇది ‘సింగం’కు సీక్వెల్ అని మొదట్లో వదంతులు వచ్చాయి. అయితే, ఇది సీక్వెల్ కాదని దర్శక నిర్మాతలు స్పష్టం చేశారు. డి.ఇమాన్ ఈ సినిమాకు సంగీతం సమకూరుస్తున్నారు. ఇదిలా ఉంటే, సూర్య-హరి కాంబినేషన్‌లో వస్తోన్న ఆరో సినిమా ఇది. వీరి కాంబోలో వచ్చిన ‘సింగం’ ఎంత పాపులరో అందరికే తెలిసిందే. ‘అరువ’లో రాశీ ఖన్నాను హీరోయిన్‌గా ఎంపిక చేశారు. ఇక ఇప్పటికే పూర్తయిన సినిమాలు థియేటర్లలోకి వెళ్లకపోవడం.. సెట్స్‌పైకి వెళ్లిన సినిమాలు తాత్కాలికంగా ఆగిపోవడం వల్ల ఇండస్ట్రీలో రెవెన్యూ జనరేషన్ ఆగిపోయింది. ప్రస్తుతం అమల్లో ఉన్న లాక్‌డౌన్ ఎప్పుడు ఎత్తేస్తారా అని నిర్మాతలు, సినీ పరిశ్రమకు చెందిన ఇతర నటీనటులు, టెక్నీషియన్లు, రోజువారీ వేతన కార్మికులు వేచి చూస్తున్నారు.
కరోనా ఎఫెక్ట్ : పారితోషికం తగ్గించుకున్న సూర్య దర్శకుడు
