ఎన్నికల సందర్భంగా వీవీప్యాట్ల రచ్చ తెరపైకి వచ్చింది. కొత్తగా తెరపైకి తెచ్చిన ఈ టెక్నాలజీ పై అనుమానాలు ఉన్నాయని, కనీసం 50శాతం వీవీప్యాట్ల ను లెక్కించాలని విపక్షాలతో సహా పలు ప్రభుత్వాలు కోరడం విశేషం. దీనితో వాళ్ళు కోర్టు మెట్లు ఎక్కారు. దీనిపై విచారణ జరిపిన ధర్మాసనం ముందు ఎన్నికల సంఘం వివరణ ఇచ్చింది.. వీవీప్యాట్ల లెక్కింపును పెంచాల్సిన అవసరం లేదని ఎన్నికల సంఘం సర్వోన్నత న్యాయస్థానానికి వెల్లడించింది. ఒకవేళ వీటి లెక్కింపును పెంచితే గనుక మొత్తం ఓట్ల లెక్కింపు జరిగి ఫలితాలు వెల్లడించడానికి కనీసం ఆరు రోజులు పడుతుందని ఈసీ పేర్కొంది. ప్రతి నియోజకవర్గం పరిధిలో కనీసం 50 శాతం వీవీప్యాట్లను లెక్కించేలా ఈసీకి ఆదేశాలు జారీ చేయాలంటూ ఏపీ ముఖ్యమంత్రి చంద్రబాబు సహా దాదాపు 21 పార్టీల నేతలు సుప్రీంకోర్టును ఆశ్రయించిన విషయం తెలిసిందే.
దీనిపై విచారణ చేపట్టిన న్యాయస్థానం.. వీవీప్యాట్‌ స్లిప్పులను లెక్కించడంలో ఉన్న అభ్యంతరాలు తెలుపుతూ అఫిడవిట్‌ దాఖలు చేయాలని ఎన్నికల సంఘాన్ని ఆదేశించింది. దీనితో నేడు ఈసీ తమ స్పందన తెలియజేసింది. ఎన్నికల నిర్వహణకు ప్రస్తుతమున్న విధానం సరైందేనని, రానున్న ఎన్నికల్లోనూ ఇదే విధానాన్ని అవలంబిస్తామని ఈసీ వెల్లడించింది. ప్రస్తుతం ఒక అసెంబ్లీ స్థానంలో ఒక్క వీవీప్యాట్‌ను మాత్రమే ఎంచుకుని దానిలోని ఓటరు స్లిప్పులను లెక్కిస్తున్నారు. దీనివల్ల ఆ నియోజకవర్గంలో పోలైన ఓట్లలో కేవలం 0.44 శాతం ఓటరు స్లిప్పులను మాత్రమే లెక్కిస్తున్నారు. ఇన్ని తక్కువ స్లిప్పులు లెక్కిస్తే ఖచ్చితత్వం తెలియదని ప్రతిపక్షాలు ఆరోపించాయి. ఎన్నికలు పారదర్శకంగా జరగాలంటే కనీసం 50శాతం వీవీప్యాట్లను లెక్కించేలా ఆదేశాలివ్వాలని కోరాయి.
డెంగ్యూ గురించి సరైన సమాధానం ఇవ్వడం లేదు: మల్లుభట్టి