ఈ రాజకీయాలు భలేగా ఉన్నాయి. ఒకే కుటుంబంలో వ్యక్తులు వివిధ పార్టీలలో ఉండటం లేదా వివిధ పార్టీలకు మద్దతు ఇవ్వడం లాంటివి ఎన్నడూ లేనివిధంగా చూస్తున్నాం. ఏపీ పరిస్థితి ఇప్పుడు అలాగే ఉంది. ముఖ్యంగా టాలీవుడ్ ఈ విషయంలో ముందు ఉంది. అదే నిజం అని చెప్పడానికి అన్నట్టుగా, టాలీవుడ్ హీరో అల్లు అర్జున్ నిన్న జనసేనాని పవన్ కల్యాణ్, నరసాపురం ఎంపీ అభ్యర్థి నాగబాబులకు బహిరంగ మద్దతు ప్రకటించిన సంగతి తెలిసిందే. ఈ మేరకు ట్విట్టర్ లో లేఖ రాశారు. అయితే, నేడు కూడా బన్నీ మరో లేఖ రాయగా, అది తన మిత్రుడు శిల్పా రవిచంద్రారెడ్డి కోసం కావడంతో రాజకీయ వర్గాల్లో చర్చనీయాంశం అయింది. శిల్పా వైసీపీ నేత కావడంతో దీనిపై అందరి దృష్టి పడింది. శిల్పా రవిచంద్రారెడ్డి నంద్యాల నియోజకవర్గం నుంచి వైసీపీ అభ్యర్థిగా బరిలో ఉన్నారు.
అల్లు అర్జున్ తన లేఖలో, శిల్పా రవిరెడ్డి తన రాజకీయ ప్రస్థానం ఆరంభిస్తున్న ఈ తరుణంలో శుభాకాంక్షలు చెబుతున్నట్టు తెలిపారు. శిల్పాను బన్నీ తన సన్నిహిత మిత్రుడిగా పేర్కొన్నారు. చాలా సంవత్సరాలుగా తనకు మంచి స్నేహితుడిగా ఉన్నాడని, జెంటిల్మన్ అని వివరించాడు. అయితే, రాజకీయ పార్టీల పరంగా చూస్తే, తాము వేర్వేరు పార్టీలకు చెందినవాళ్లమని, తమ రాజకీయ భావజాలం కూడా పూర్తి భిన్నమని, కానీ స్నేహం కోసం తన మిత్రుడికి హార్దిక శుభాకాంక్షలు తెలుపుతున్నట్టు బన్నీ వివరణ ఇచ్చారు.