సాయిపల్లవి, ఫహద్ ఫాసిల్, ప్రకాష్ రాజ్, అతుల్ కులకర్ణి ప్రధాన పాత్రల్లో నటించిన సినిమా ‘అనుకోని అతిథి’. మలయాళంలో ఘన విజయం సాధించిన ‘అధిరన్’కు తెలుగు అనువాదం. నవంబర్ 15న ఈ సైకలాజికల్‌ థ్రిల్లర్‌ను విడుదల చేస్తున్నట్లుగా చిత్రయూనిట్ ఇప్పటికే ప్రకటించింది. అయితే అనుకోని కారణాల వల్ల ఈ చిత్రం చెప్పిన తేదీకి విడుదల కావడం లేదని చిత్రయూనిట్ తెలిపింది. త్వరలోనే విడుదలకు సంబంధించి కొత్త తేదీని ప్రకటిస్తామని తెలుగులో ఈ చిత్రాన్ని విడుదల చేస్తున్న నిర్మాతలు తెలిపారు. ఇన్ ట్రూప్ ఫిలిమ్స్ సమర్పణలో జయంత్‌ ఆర్ట్స్‌ బ్యానర్‌పై నిర్మాత అన్నంరెడ్డి కృష్ణకుమార్, గోవింద రవికుమార్ తెలుగులో ఈ సినిమాను విడుదల చేస్తున్నారు. ఈ సందర్భంగా నిర్మాతలు మాట్లాడుతూ “కేరళలో 1970లలో వాస్తవంగా జరిగిన ఘటనల ఆధారంగా రూపొందిన చిత్రమిది. ఇటీవల సెన్సార్ కార్యక్రమాలు పూర్తయ్యాయి. క్లీన్ యు సర్టిఫికెట్ లభించింది. ఈ చిత్రాన్ని కుటుంబమంతా కలిసి చూడొచ్చు. ఉత్కంఠకు గురి చేసే కథ, కథనాలతో సినిమా రూపొందింది. నవంబర్ 15న చిత్రాన్ని విడుదల చేయాలని చూశాం. కానీ ఆ తేదీన విడుదల చేయలేకపోతున్నాం. త్వరలోనే విడుదల తేదీని ప్రకటిస్తాం. సాయి పల్లవితో పాటు తెలుగు ప్రేక్షకులకు సుపరిచితులైన ప్రకాశ్‌రాజ్ మరియు అతుల్ కులకర్ణి ఈ చిత్రంలో ప్రధాన పాత్రల్లో నటించారు. ప్రభాస్‌ ‘సాహో’కి నేపథ్య సంగీతం అందించిన జిబ్రాన్‌ ఈ చిత్రానికి అద్భుతమైన నేపథ్య సంగీతం ఇచ్చారు” అని అన్నారు.
సాయిపల్లవి “అనుకోని అతిథి” వాయిదా
